ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាការកាន់តំណែងជាប្រធានអាស៊ានឆ្នាំ២០២២គឺមិនមែនជារឿងងាយស្រួលនោះទេ ព្រោះមានបញ្ហាជាច្រើនដែលមិនធ្លាប់មានពីមុនមកត្រូវដោះស្រាយ។ សម្ដេចថាសូម្បីតែការរៀបចំកៅអីសម្រាប់រដ្ឋមន្ត្រីការបរទេសប្រទេសនីមួយៗអង្គុយក៏ត្រូវគិតគូរឱ្យបានច្បាស់លាស់ដោយសារប្រទេសទាំងនោះកំពុងមានបញ្ហាប្រឈមដាក់គ្នា។

សម្ដេចបន្ថែមថាកុំថាឡើយការរៀបកៅអី ការចេញសេចក្ដីថ្លែងការណ៍ក៏មិនងាយស្រួលដែរ តែសម្ដេចតេជោបានបញ្ជាក់ថា «កម្ពុជានៅតែមានសមត្ថភាពសម្របសម្រួល»។

គួរឱ្យដឹងថាកម្ពុជាបានក្លាយជាប្រធានអាស៊ានប្ដូរវេនក្នុងឆ្នាំ២០២២នេះ ដែលមានបញ្ហាស្មុគស្មាញក្នុងតំបន់ជាច្រើនដែលកម្ពុជាត្រូវចូលរួមទាំងបញ្ហាកូវីដ-១៩ បញ្ហាមីយ៉ាន់ម៉ា វិបត្តិសង្គ្រាមរុស្ស៊ី-អ៊ុយក្រែន បញ្ហាសេដ្ឋកិច្ច និងការប្រកួតប្រជែងភូមិសាស្ត្រនយោបាយរបស់ប្រទេសមហាអំណាច។ ប្រទេសចិនបានបង្ហាញជំនឿថាក្រោមការដឹកនាំរបស់សម្ដេចតេជោ អាស៊ានអាចប្រែក្លាយបញ្ហាក្ដៅនេះជាជោគជ័យដែលមានតម្លៃមួយ៕ 

^{PHOTO: EAC NEWS}